SPEPAL FATUMETA......

KETA TAUK....!!!!
por:  El Tyno Perdydo
dedica especial para os mesu irmãos que foram ordenados em Maliana

Loromatan mosu dadaun husi matebian tutun
Manu fuik hahu hahanu lian natureza
Naroman taka rai  timor
Matak malirin furak ba bebeik
Timor nia furak la subar tan ona husi mundo matan

Hau hamrik iha foho tutun
Hateke ba lorosae  furak la lakon
Hau hateke ba loromonu furak la lakon
Hau rona lian ida husi leten
“imi mak hau nia bibiatan ba nafatin”

Imi laos ema riku
Imi laos ema matenek boot
Imi laos ema nebe hatene buat hotu
Maibe imi ema bain-bain deit
Ema nebe nakonu ho sala

Hau bolu imi laos atu sai ema riku
Hau bolu imi laos atu sai ema konhecido
Hau bolu imi laos atu sai ema boot
Maibe hau bolu imi atu hili imi
Sai ema nebe ema ida la hatene no la konhece

Kesi metin imi nia futukabun
Lori imi nia bukaen
Kaer imi nia ai tonka
Lao ba iha fatin hotu-hotu
Fiar metin ba katak imi sei la lao mesak
Imi nunka mesak iha imi nia moris

Hau la obriga imi halo buat boot liu
Hau la haruka imi halo milagre boot
Maibe hau haruka imi atu halo buat nebe kiik liu
 ho domin nebe boot
Basa ho domin boot imi bele muda mundo

Keta tauk!!!!
Imi nia matan ben sei sai mahowen
Imi nia kolen sei sai aifunan midar
Imi nia triste sei sai ksolok
Imi nia terus sei fo moris ba ema hotu
Keta tauk!!!!
Nia matan sei la taka ba imi
Nia sei selu hotu buat nebe imi halo
Basa nia nunka husik imi lao mesak iha imi nia moris tomak
Nia sei lori too rohan buat nebe imi hahu dadaun ona nee
keta tauk.....!!!!!!

dedica ba hau nia belun sira nebe simu ordenasaun iha Maliana
22 de fevereiro de 2011
CONGRATULATION